«Non creo que se medre por ler un libro», fungaba Miguel. «Pois eu, cada vez que entro nun, saio diferente. Un levoume a coñecer unha illa habitada por un náufrago; outro á lúa, montado nunha bala de canón», dixo o avó, «Colle ese que está aí e ábreo pola última páxina. Ves o punto final?» Entón comezou a aventura… Miguel escorrega a través do punto final dun libro e cae nun delirante mundo de fantasía.
Con Xelá, Álex se o lemos ao revés, navega por un río de vidro nunha bañeira de vapor con patas de león, viaxa por desertos de azucre… Esta é unha historia sobre o crecemento persoal, e sobre a importancia que os soños teñen na formación dos máis pequenos e no seu desenvolvemento posterior como adultos. O libro e a lectura representan unha ponte entre os soños, que todos precisamos, e a realidade de cada día.
No mundo do imaxinario todo é posible, e o protagonista, ao que non lle gusta ler nin imaxinar, vai descubrir o pracer da creatividade e a imaxinación, xunto coa afectividade. Desde o punto de vista plástico, Marta Torrão ofrécenos unhas ilustracións onde o seu particular imaxinario de personaxes adquire unha nova dimensión, máis depurada, na que xoga con dous niveis de acabamento: o debuxo a lapis en branco e negro para algúns momentos, e a recreación combinada de debuxo e colaxe a cor para os momentos de maior intensidade da historia.
Coa mestura do marabilloso e do fantástico, asentado na base do real, esta é unha historia para ler, reler e redescubrir en cada lectura. Velaquí unha ocasión para nos converter, como lectores, en creadores de soños, en loitadores sen armas.
Idioma: Galego